السبت، 12 مارس، 2011

الطعمية المختفيه

كل يوم اقوم من النوم الصبح على ريحه الطعميه الرائعه طبعا ما هوا انا بعد بيتنا بكام بيت مطعم فول وطعمية انما ايه حكايه الناس بتجيله من كل الدنيا وكل يوم اقول لنفسي ياسلام على سندوتش طعمية بالسلطه كده والطعميه خارجه من الزيت بلونها الذهبي وريحتها اللى تهبل او حتى طعميه فى عيش فينو ياسلام ايه الحلاوة دى مزيكا يا خواتى بس طبعا ولانى يا جماعه علطول بصحى من النوم متاخره وعلطول الحمد لله بروح شغلى متاخره ولا مره قدرت احقق الحلم ده فى يوم بقى صحيت من النوم زى العاده متاخره وبدور على هدومى فى كل مكان فى الدنيا (مش فى الشقه بس) المهم وعلشان منتوهش عن بعض قررت بقى اليوم ده وريحه الطعمية كانت اقوى منى انى لازم لازم انزل اجيب سندوتش الطعمية ده المهم يا جماعه نزلت فعلا ورحت لحد المطعم عادى ما انا متاخره بقى ولا يهمنى دخلت قلتله عايزة سندوتشين طعمية رد الراجل عليا بشياكه كده معلش هتستنى شويه لحسن الطعمية خلصت ولسه هنطحن الفول قلتله وانا كلى صدمه لا بجد ودى قدامها قد ايه قالى معلش بتاع ساعه إلا ربع كده قلت ياربى انا لو رجعت البيت مش هنزل ونداء السرير هيغلبنى خلاص بقى انا امشي وابقي اجيب من مكان قريب من الشغل ومشيت يا جماعه وانا مضايقه جدا اومال الريحه اللى انا شمتها دى كانت ايه تهيؤات بقى ولا ايه يالا بقى ما علينا المهم وصلت لحد الدقى وانا كلى امل فى سندوتش طعميه سخنه يا جماعه قبل ما اوصل الشغل رحت لحد المطعم وانا هناك بقولهم سندوتش طعمية (شوفتوا اتنازلت عن واحد فى مقابل انى احقق أملى) قالى معلش العيش مجاش النهارده وعلشان كده مبنعملش سندوتشات، يانهار ملون اعمل ايه حد يقولى طيب خلاص مفيش فايده انا اروح الشغل واطلب من هناك ديلفرى صحيح هيجي بارد لكن اهو هيجي وخلاص المهم وصلت الشغل يا جماعه وفجأه اول ما دخلت ولا انا فى الدنيا مين بيزعق مين بيطلب شغل مين بيقول ايه انا موجهه ناحيه عامله السويتش اطلبيلي سندوتش طعميه يجيلى مكتبي دلوقتى على طول تقوم ترد عليا كرم الله وجهها معلش التليفونات عطلانه لأأأأأأأأأأأأأأأأأأأأأ مش ممكن ايه ده طيب خلاص انا هطلب من موبايلي واول ما اجى اتصل تطلع الست الظريفه اللطيفه اللى هتجيبلى فى يوم انهيار عصبي وانا مهيئه جدا ليه تقولى اسفه يا اختى ممعكيش فلوس انتى جايه تهرجى (يعنى رصيدي خلص يا جماعه) المهم اتصرفت وبعد عناء فى دقيقه موبايل ومحدش يسئلنى جبت الدقيقه دى منين لان دى كمان طلعت معاناه هحكيلكم عليها بعدين (اصل البلد دى مفيهاش حد بيقبض علشان يشحن) واتصلت بالمطعم يا جماعه والله بقى على اللى سمعته اول صوت الولد ما رد عليا وقلتله على طلبي قالى اسف يا فندم مفيش دليفري دلوقتى اصل مفيش حد منهم جه النهارده مش ممكن ايه ده انا خلاص عقلي هيطير انا مروحه بقى وهعدى على محلات الطعمية فى طريقي وهاكل طعميه النهارده وفعلا روحت وعديت على محل الطعميه واول ما وصلت للمحل ده كمان لقيته بيقفل وبيقولولى اسفين جدا هنقفل بدرى لظروف قهريه وخلاص يا جماعه انا فرهدت بقى مش عايزة طعميه انا هروح انام افيد برده وداعاً ايتها الطعميه المختفيه إهى إهى إهى إهى

ليست هناك تعليقات:

إرسال تعليق