الجمعة، 18 نوفمبر 2011

فستان سوارية

فرح بنت عمتى كمان اسبوع، فالمفروض نجهز نفسنا علشان نحضر الفرح، وطبعا علشان نجهز نفسنا يبقى المفروض بقى فستان سواريه وحذاء سوارية وكمان كوافير وطرح وحركات انا من وجهه نظرى انها سخيفه جداجداجدا، المهم بقى انا عندى مشكله جامده جدا فى موضوع انك تنزلى تشترى لبس، بيبقى هم ثقيل جدا على قلبي، ومش زى الناس اللى كل ما تزهق تقول احنا ننزل نتسوق بقى، انا بحب وبستمتع لما يبقى عندى اكتئاب او حتى معنديش اكتئاب، انى اروح مكتبه اشترى كتب او اروح اشترى اقلام ومفكرات وحركات من دى، او اشترى اكسسورات لكن لبس يا اااااااااااااه هم ثقيل قوى على قلبي، انا بشترى اللبس بالصدفه، او لما اتزنق زى المرادى بقى، المهم بدأنا الرحله المرادى يوم الجمعه بعد الصلاه علطول، نزلنا عباس العقاد علشان نتفرج على الفساتين او السواريهات انا مكنش عندى اى حماس بس مش عايزة ازعل الناس ولا مامتى ولا اختى، نزلنا انا وهدية اختى وكومبو اختى الصغيرة اول حاجه صدمتنى بقى يا جماعه اسعار الفساتين فووووووووووووو اقل حاجه شفناها كانت بمبلغ 650 جنيه، ليييييييه 650 جنيه؟؟؟، لا دى اقل حاجه لقيناها والحاجات الحلوة اللى ممكن نبص عليها كانت 1600 و1400 و1100 ، ليه يا جماعه؟ انا مش فاهمه اى حاجه، انا متاكده ان الفساتين مش هتتكلف كل ده فى تكلفتها، نبعها بالسعر ده ليه؟ لا والاهم من كل ده ان احنا فى مصر نسينا ان البلد دى فيها محجبات، عملين فساتين سوارية لغير المحجبات، زى ما يكون المناسبات المفروض انها لغير المحجبات تماما، ودى حاجه من ضمن الحاجات اللى بتخلى رحلاتى مع شراء الملابس عموما رحلات صعبه جدا، انهم دائما مش فاكرين المحجبات خالص، فضلنا نلف كتير جداجدا ووقت طويل جداجدا وفى الاخر خالص قررنا نرجع النهارده ونكمل الرحله مره تانيه فى مكان تانى، دعواتكم بقى علشان حاجه صعبه جدا اللف على شراء الملابس بقى

هناك 8 تعليقات:

  1. بتفكريني بحد اعرفه ههههههههههه..في يوم من الايام لازم حد يفكرني ان لبسي صغير عليه..

    والله مش عار ف يا نونا اللبس غالي ومش بيراعي كل الاذواق..انا بحب اللبس الفورمال لكن مش من واة الافراح والاجتماعيات..

    ردحذف
  2. هههههه

    خلاص

    ريخى نفسك وبلاش سواريه من اساسه ومشيها اى حاجه :)

    ردحذف
  3. @محمد البرقي
    محمد انا فرحت قوى انى لقيت حد زى هههههههههه اصلى انتوخه قوى بالنسبه للشراء

    ردحذف
  4. @خالد ناجى
    خالد موافقه البس جينز وكده نبقى اصحاب وتمام التمام

    ردحذف
  5. شراء اللبس ده كارثة فعلا !!
    و مش بيراعوا كل الناس اللى بتشترى فعلا ..
    و لا فى الأذواق و لا الأسعار و لا حاجة
    لكن اوقات بتكونى مضطرة ..
    ربنا معاكى و يا رب تلاقى فستان حلوو كده :)

    ردحذف
  6. أنا الإسبوع ده عندى فرحين
    ومش لابسة سواريه مع ان عندى لبس سواريه
    بس الدنيا برد جداً وكدة هاتقطم من السقعه :D
    وكمان أصلاً لبس السواريه ده شغلانه
    ياباااااااااااااى :D

    البسى يا بنتى أى حاجة كلاسيك وخلاص :D

    ردحذف
  7. @Radwa Ashraf
    شكرا يا رضوى دعوتك

    ردحذف
  8. @Sea Lover
    حاضر هحاول اقنع مامتى

    ردحذف