عيد الحب

طظ هى دى الكلمه اللى بحس انى عايزة اقولها لما بتيجي قدامى سيرة عيد الحب

او هى اول حاجه بتيجي فى ذهنى

بالنسبالى اليوم ده يوم مختلف شوية يعنى كان ليه عندى معنى

بس مش لانه يوم عيد الحب لا لانه يوم عندى فيه ذكرى حلوة

لكن بعد شوية ومازلت الذكرى بالنسبالى حلوة عايزة اقول طظ لعيد الحب

وطظ للبنات اللى بتجيب هديه عيد الحب للولاد وطظ فى الولاد اللى بتجيب هدية عيد الحب للبنات

وطظ فى الحب وطظ فى وطظ فى كل حاجه

ايه اللخبطه دى كلها مهو الحب حلو والبنات والولاد اللى بيجيبوا هدايا مغلطوش فى حد

ولا فى حاجه هى اى نفسنه وخلاص؟

ايوة هى اى نفسنه وخلاص

طيب وهما مالهم هما اللى قالولك متجبيش لحد هدية؟ ولا حتى خلو حد ميجبلكيش هدية؟

لا طبعا هما ملهمش اى ذنب فى اى حاجه بس انا زهقانه من مفهوم كل حاجه اللى ملخبط فى الدنيا دى

بس انا خلاص مش مهم كمان بالنسبالى حال الدنيا حتى دى كمان طظ فيها

المهم دلوقتى بقى انا هقولكم نفسي فى ايه

نفسي فى حد يعلمنى الانانية ايوة يعلمنى الانانية

يحبنى جدا جدا جدا جدا جدا هو اللى يحبنى مش انا اللى احبه

يخليني مشفش حد فى الدنيا غيره

ومش كلام افلام على فكره لا خالص بقى دا موضوع تانى خالص

حد ميعرفش يعمل غير انه يديني يدينى وبس

وميستناش ياخد منى اى حاجه

يستنانى دايما ومش انا اللى استناه حتى لو اتاخرت عليه

يعاملنى على انى كل حاجه فى حياته برغم وجود الآلاف اللى حواليه

ويكونوا كلهم موجودين ومهمين فى حياته لكن برغم كده انا موجوده

ينسينى كل الدنيا ومفتكرش غيره

بس بيتهيئلى ان ده صعب شويه وجوده حوالينا

علشان كده انا بقول طظ فى كل حاجه بجد طظ فى وطظ فى قلبي وطظ فى احول الدنيا الملخبطه

لقيته او ملقتوش مش مهم

بس نفسي يجي على عيد الحب فى يوم من الايام وانا حاجه من الاثنين

اما ناسيه كل حاجه عن يوم 4 ده وكل المناسبات اللى فيه حتى لو يكون ده نتيجه زاهيمر

او مستنيه اليوم ده يجي من حلاوته بفارغ الصبر