قطة

واحنا مروحين من الشغل زى العاده انا وداليا صاحبتى ومحمد صحبي برده قالت داليا عايزين نعدى على المكتبه علشان نشترى كشاكيل للمحاضرات وفعلا بدل ما نمشي للمترو رحنا العكس ناحيه المكتبه انا عارفه ان كل خطوة بنمشيها مقدرة علينا ودايما لما بنغير خططنا فى اى مشروع هنعمله ببقى متاكده ان ربنا كاتب لنا كده علشان حاجه هو بس اللى عارفها المهم رحنا المكتبه وملقناش النوعيه اللى احنا عايزنها من الكشاكيل ولما خرجنا من المكتبه لحظنا ان فى قطه صغيرة جدا عماله تنونو مسكينه قوى بصوت عالى جدا المهم كان فى ايد داليا ساندوتش جبنه مقليه راحت بدأت تدى للقطه منها والقطه تاكل وفضلنا على الوضع ده احنا الثلاثه لحد لما القطه بطلت تاكل ولسه عماله تنونو تقريبا الجبنه الرومى المقلية معجبتهاش والله عندها حق اصلى رغم حبي للساندوتش ده هو حادق جدا المهم داليا قالت انا هروح اجبلها لبن وراحت فعلا تجبلها لبن ووقفت القطه تتمسح فى رجلينا وتلعب معانا واللى رايح وجاى مستغرب جدا ان فى اثنين سايبين اللى وراهم وواقفين يلعبوا مع قطه ههههههههههه كانوا بيقولوا بعنيهم دول اكيد مجانين حتى اصحاب المكاتب خرجوا يتفرجوا علينا والقطه عماله تلعب معانا وبعدين زاد تاكيدهم على جننا لما جت داليا وفاديها علبه جبنه نستو فاضيه محطوط فيها كيس وفضت علبه اللبن فقلب العلبه وحطته للقطه والقطه بدأت تاكل فضلنا واقفين مع القطه احنا الثلاثه لحد لما شبعت خالص من اللبن وبعد كده بدأت تلعب تانى وتجرى ورانا وتتمسح فينا ما اروع ان تسعد كائن ليس له حول ولا قوة فيتحول شعورك الى السعاده وعلشان هى ليها نصيب تاكل وتلعب معانا احنا غيرنا اتجهنا ورحنلها بنفسنا

اعدوا بالعافيه