السبت، 12 نوفمبر 2011

العواف عليكم



ايوة العواف عليكم، ايه مستغربين ليه؟ دا العواف عليكم ، وكمان فتكم بالعافيه، وكمان اعدوا بالعافية، والرد بقى يكون يعافيكم، الكلمات دى بالنسبالكم دلوقتى غريبه وقديمة او بيئة، لكن بالنسبالى مئلوفه قوى، حلوة قوى، فى الاول كانت بالنسبالى كده زيكم برده، لكن بعد كده لما رددتها وحسيت معناها عجبتنى قوى، ليها كده مزيكه فكرتنى بالاغنية بتاعه فيها حاجه حلوة حاجه حلوة منك، اول مره قلت فيها الكلام ده، كنت فى كفر الشيخ مأمورية شغل ووحنا فى العربيه كنا بنعدى على كفور ونجوع مصر المحروسة، اللى فى كفر الشيخ والشرقية والدقهليه وبورسعيد وبورفواد والاسماعليه وكمان اسكندرية، المهم كان فى ستات كتير دايما قاعدين على راس غيط أوطريق أو حتى ترعه، واحنا معدين قلت اول مره السلام عليكم بصوت مكسوف خالص علشان كانوا بصنلى وانا فى العربية، فمردوش عليه السلام ومنا هنا كنت تريقه كل زمايلي اللى كانوا معايا، وواحد منهم قلى المفروض تقولى العواف عليكم فضحكت قوى وحسيت انها حاجه صعبه جدا انى انا اقول كده، لكن وبعدها حاولت فى الاول طلعت منى مستحيه جدا، لكن بعد كده كنت بقول العواف عليكم بقلب جامد وصوت عالى واضحك والناس تضحك، ومحدش فينا عارف التانى بيضحك على ايه لكن كانت بجد ضحكات الناس حلوة، حلو قوى انك تحس انك من قلب الناس ودا كفايه علشان فى مصر يفتحلك ابواب كتتتتتتتتير مقفلة، ودلوقتى بقى اقعدوا بالعافية.






هناك 15 تعليقًا:

  1. عمرى ما جربت اقولها
    بس برده لو جيت اقولها هتكسف اوى اصلا :$
    هى تعد من الكلمات التراثية فمصر :)
    هبقى اجرب ;)

    ردحذف
  2. @miss loza
    والله جربي هتتبسطى جدا جدا وبعد شوية هتبهرك بس ابقى قوليها كذا مره متكتفيش باول تجربه لحسن دى بتبقى صدمه هههههههههههههههههه واعدى بالعافية

    ردحذف
  3. المشكله بس اننا مش متعودين على الكلام ده
    زى ما كل واحد ليه كلام معين مثلا بيبق لازق اوى معاه ومتعود عليه
    ممكن غيره يستغربه
    الفكره اننا نتعود على حاجه بس
    مبسوطه انى عرفت مدونتك
    وهتابعك ان شاء الله فى الحمله :)

    ردحذف
  4. التدوينة رائعة يا نونا ولازم نفهم ان الرقي يكون نابع من تراثنا و ان نطورة ولا نستبدله بتراث اخر لنصبح ارقى..تحية خالصة ودمت بود :)

    ردحذف
  5. فكرتيني ب "ريم ماجد"...بصي هي حلوة بس عشان احنا من أهل كايرو ف احنا مش متعودين عليها و كدة..بس هي جميلة....لأننا خلاص فقدنا لهجتنا المصرية و بقينا نتكلم فرانكو علي انجليزي علي فيومي...

    تحياتي...ريم!

    ردحذف
  6. @ Bent Men ElZman Da
    صح عندك حق اللزمه اللى فى لسان الانسان منا زى اللى لما تقوليلوا اى حاجه يقولك بجد او طيب احلفى او حتى فعلا؟ ههههههههههه كلها لزمات ولو ركزنا مع بعض هنهيص

    ردحذف
  7. @ محمد البرقي
    انا سعيده جدا انها عجبتك وكنت نفسي اعرف رايك فيها جدا بجد اسعدنى وجودك وان شالله دايما تعد بالعافية

    ردحذف
  8. @ريم عصام
    ريم يا حبي انا مكنتش بحب ريم ماجد خالص علشان اول ما عرفتها عرفتها بعد حادثه القديسين وكانت علطول منفعله ومكنتش اعرف بتقدم ايه ولا حتى فين بس كانت مضايقانى ولما رجعت من السفر ولاكلمه دى بقت فى لسانى كل الناس بقت تقولى انتى بتقلدى ريم ماجد قلت لا والله لازم اقعدلها بقى بس تتصورى حبتها قوى وعجبتنى حسيت انها بنت بد جدعه او ان فيها حاجه حلوة زيك كده نا برده عاسه ان فيكي حاجه حلوة خليتك بعافية

    ردحذف
  9. جميلة هى تدوينتك دى يا نونا..

    بجد رائعة..

    حلو أوى إن الإنسان لا يترفع عن ثقافة بلده،، والكلمات اللى اشتهرت بيها..

    مميزة يا نونا..

    العواف عليكى ^_^

    ردحذف
  10. العواف عليكى يا اختى :)

    انا بحس ان كل فتره بنقعد حضاره ال 7 تلاف سنه

    بس مش بنتمسك بالحضاره الاصيله دى

    حان الوقت لتمسك بها :)

    موضوع جميل ومهم شكرآ لك :)

    ردحذف
  11. @ Hadeer Ghattas
    الله يعافيكي يا قمرايه وفعلا حلوة ثقافتنا

    ردحذف
  12. @ rona ali
    ربنا يخليكي يارب وشكرا على مرورك يا جميله

    ردحذف
  13. @ خالد ناجى
    ويعافيك يا جميل

    ردحذف