الجمعة، 11 نوفمبر 2011

لخبطه... وحيرة


النهارده اول يوم فى حمله تدوين يومى ولمدة شهر، كنت فكره ان الموضوع سهل، هكتب زى ما بكتب عادى، صحيح مش كل حاجه بنزلها فى المدونة، لكن فى الاخر بكتب، على ورقه او فى كشكول او اى حاجه، بس دى هتبقى اول مره اشترك فى مشروع للمدونين، وكمان كنت شوية متردده لكن قررت اشترك لكن عند التنفيذ ظهرت بقى الحيرة فى اول تدوينة اكتب عن ايه.... اكتب عن ايه.... اكتب عن ايه؟؟ بس قلت انا اول حاجه هكتب عنها الرأى والرأى الاخر دى بالنسبالنا ثقافه مفقوده، كل واحد فينا مش عايز يسمع غير راى نفسه وبس، وان هو بس اللى صح زى كده امركا وايران، ايران تقول هسلح نفسي، امريكا تقول عقوبات على ايران، ايران تقول هضرب اسرائيل، اتعاطف انا مع مين بقى دلوقتى؟ مهى ايران مش صديقه بس اسرائيل عدو، خلاص يبقى هكتب عن امريكا واسرائيل وايران، طيب ماكتب عن ايران وسوريا، مهى ايران بتدعم سوريا وبتساعدها، ورئيس سوريا بيقتل فى اهله، وبرده كل واحد فيهم شايف انه صح والتانى هو اللى غلط، طيب مهى مازالت ايران مش صديق بس سوريا المرادى مش عدو، طب وبعدين بقى فى الحيرة دى هو الراجل بشار ده على حق ولا ايه النظام يعنى دى ثورة ولا مؤامرة، ثورة افتكرت اليمن ياترى هما هيخلصوا الثورة بتاعتهم دى امتى؟ وياترى هتخلص على ايه؟ والربيع العربي ده هيكتمل ولا لا؟ انا كنت فكره اليمن هتخلص قبل ليبيا، لكن ليبيا خلصت الاول، بيهزروا والله، وبيتهئلى كده انهم هيقفوا اسرع مننا ، احنا.... آه صحيح دا انا صحيت الصبح من النوم كده بقول يافتاح يا عليم يارزاق ياكريم على خبر كده بقى وانا ايه باخد النسكافيه بتاعى وبفكر فى اول تدوينة عن ان الرئيس المخلوع يمكن يطلق سراحه قريب يالهوى يطلق سراحه قريب دا انا كنت اروح فيها ربنا يستر عليكي بقى يا مصر ، مصر صحيح هى المسكينة مصر دى هتلقيها منين ولا منين من اللى هيفرجوا عنه ده ولا اللى عمالين يقولولها دم الشهداء، ولا اللى عمالين يقولوا عجله الانتاج، ولا اللى عمالين يقولوا السياحه التضربت ولا من اللى طمعانين فيها من بره زى الماسونين اللى كانوا جايين يعملوا فيها حفله تحت سفح الهرم دول ولغتهالهم السياحه هما دول صحيح ماسونين ولا هما ميتافيزيكاليين ، ميتافيزكاليين ايه الكلام الكبير ده، ووصلت لحد هنا ولقتنى بغنى الاغنيه بتاعت شبكه حيرة وكدبه كبيره وانا جواها طلعت مغفل، التفاصيل وعقارب الساعه
بتوهنى بتلخبطنى ،هيجننى اللى انامش عارفه ، واللى انا عارفه اسطعبطنى.

http://www.youtube.com/watch?v=tlK29vilGfo

هناك 14 تعليقًا:

  1. بصى هو الموضوع نفسه الى انتى تناولتيه حلو اوى
    فكرة عدم احترام بعضنا لاراء البعض الاخر
    بس هى فى مشكلة واحدة
    انتى اتكلمتى عن الموضوع من الجانب السياسى
    وبصراحة وزى ما دايما بقول
    "انا حمارة سياسة :D "
    بس البوست حلو برده :)

    ردحذف
  2. @miss loza
    شكرا على مرورك ومبسوطه انها عجبتك
    ومعظمنا مش فاهم وعلشان كده متلخبطين انا مفرقش عنك كتير على فكره

    ردحذف
  3. تصدقي انا محتارة نفس الحيرة بتاعتك دي...ربنا يفكها علي خير :)

    ردحذف
  4. انا كمان مليش ف السياسه اوى

    بس الحملة فرصة كويسه لان اكيد

    كلنا هنكتب حاجات مختلفه وممكن

    حد يكتب عن السياسه ولما هنقرأكتير

    هنفهم اكتر تحياتى ليكى يا قمر

    متابعة بأستمرار وانا كمان مشتركه ف الحملة

    ردحذف
  5. @ ريم عصام
    يارب يا ريم ويخرجنا من الايام دى على خير يارب

    ردحذف
  6. @ MENA
    ياريت والله تعرفى يا منه دى اكتر حاجه عجبانى فى الحمله انى هقرأ كتير ويمكن اكتب على الاقل حاجه فى اليوم وشكرا على المرور ياقمر

    ردحذف
  7. اطلالتك عندك اسعدتنى عن جد

    بصي اعتقد الاغنيه المناسبه انا مش عارفنى هههههههه

    والله كلنا في نفس ذات الحيره انا بقي حاسه بامل بس مش شايفه ربيع عربي
    مش بقلل من ثوراتنا لكن لسه قدامنا كتير علشان نحس بالانتعاش الربيعي وابقي مرتاحه

    الغريب ان شعب زى الليبين انا انتقدهم حتى في طريقه تمثلهم للقذافي انتقدهم كشعب قبائلي
    بس اثبتوا انهم علي الطريق الصح واحنا بره الخط

    حتى السورين الاسد طالع الاسد قاعد هما هيكملوا صح

    من هنا احب اشيد وامجد واعظم فعلآ في ثورة تونس هما دوال الناس اللي يستاهلوا رفع القبعه

    انا ممكن ارغي اكتر من كدة بس رافتآ بيكى كفايا كدة :)

    ردحذف
  8. كل سنة وانتى طيبة
    اعجبنى اسلوبك ف التدوين
    تقبلى تحياتى

    ردحذف
  9. هههههههههه

    هيا فعلا حيره

    ربنا يستر
    :)

    ردحذف
  10. شكري و تقديري لقلم سامق الحرف و قويم التوجّه .

    لك اعجابي و متابعتي

    منجي باكير

    مدونة الزمن الجميل يسعدها دعوتك إلى جديدها :ت الوصاية / رأيك له أهميته !

    ردحذف
  11. @ rona ali
    وجودك اسعدنى وتفعالك معايا ادانى احساس ان المعنى وصلك ودا شئ طمنى ومن ناحية الرغى فهو دا المطلوب يمكن نفهم

    ردحذف
  12. @ ذو الوجه المبتسم
    وانت طيب واشكرك على وجودك وذوقك

    ردحذف
  13. @ خالد ناجى
    شكرا على وجودك وفعلا ربنا يستر

    ردحذف
  14. @ منجي باكير
    شكرا على ذوقك ورقتك وكلماتك الجميله وجودك اسعدنى

    ردحذف