الاثنين، 18 ديسمبر 2017

سكان العشوائيات ما بين ضيوف او اصحاب مكان

سكان العشوائيات موضوع عامل صداع فى دماغ الوطن، مع ان دماغ الوطن مفشوخ حرفيا، تعليم وصحة وديون خارجية وديون داخلية واقتصاد وتضخم وارهاب وتحرش وقضايا حريات وعشوائيات وتغير مناخ، يالهوى هي فين دماغ الوطن دى، اه والله زمبولك، بس انا مش هتكلم فى كل دا انا هحكى موقف وهقول رايي، المهم ايه الموقف بقى، وانا بعيث فى الارض فسادا قصدى وانا بتجول فى تويتر twitter لقيت موضوع عنوانه:("الاسمرات" اسكان الدولة "النموذجى" للمواطن "العشوائي"، الموضوع استفزنى جدا رحت داخله خابطه فى اللى كاتبه علطول وقولت رايي من غير اى تفكير الراجل من ذوقه واخلاقة وضبط نفسه سئلنى اذا ممكن اوضح، اسهبت ودى فرصتى، الراجل رد عليا تاني بشياكه اكتر من المره الاولى وقالي حضرتك قرأتى الموضوع، المهم قررت اقراء الموضوع، الاندفاع وحش ياجماعه لاني ولاول مره انبسط جدا كده لقيت حد بيتكلم زيي، نزل من واقع تجارب الناس على ارض الواقع وحكي، اقولك بقى انا رايي ايه، ياسيدى مش مهم تسمع رايي بس اديني بسجله، بص بقى تعرف تعد لغايه كام؟ طيب ابداء عد ياحلو:
1. الناس اللى جايين من العشوائيات دول كانوا ومعظمهم مازال بيشتغل فى حاجات او وظائف بسيطه جدا جنب مكان السكن والغالبية وظائف حره ارزقيه يعني مرتباتهم ضعيفه بعد الازمة الاقتصادية وحتى اللي على مرتبه منهم قيمة دخلهم انخفضت جدا
2. لما نقلنا الناس لمناطق السكن الجديدة منقلناش العمل فاصبح بيستقطع جزء من المرتب اللى قيمته انخفضت علشان المواصلات اللى هى قيمتها غاليه بالتالى زودت عبء على دخله المنخفض القيمة اصلا
3. الناس دى كانت ساكنه مبتدفعش فلوس ادتها الوحدات ودفعتها قيمة ايجارية رمزية بالنسبة للدوله لكنها عبء على صاحب الدخل اللي مكنش بيدفع اصلا
4. الناس دى لانها كانت فى عشوائيات او مناطق خطره مكنتش بتدفع ولا كهرباء ولا مياه ولا غاز ولا مرافق ولا صيانه واللى كان بيدفع كان بيدفع شريحه منخفضة لما نقلناهم دفعناهم كل دا بشريحه مختلفة، منين ياولاد من الدخل المنخفض القيمه يابيه متصحصح معانا ياعمنا جرا ايه
5. الناس دى اتنقلت من غير اى تاهيل لا نفسي ولا اجتماعى تجاه المبانى الجديدة، المنطقة الجيران، ولا ازاى يتعاملوا مع المبانى ولا حتى ازاى يسكن جواها، صيانتها ازاى يعني مش غريب حتى انك بعد شوية تلاقيه مقفل البلكونة بجبس واسمنت وطوب احمر او حتى بصفيح وكارتون ومربي تحتها كتاكيت وبط انا مش بقلل منهم لكن دى ثقافته اللى انت مرعتهاش وانت مش هتفضل حاطط لهم عساكر هناك لاخر العمر
6. اخر حاجه ومن غير عنصرية والله، الحى النموذجي هو حى الاسمرات اللى اتعمل على اسم كومبوند يحمل نفس الاسم يسكنه فئات وطبقات مختلفه كأى كومبوند فى مصر ومن الناس اللى ساكنه هناك وصلنى شرح مفصل لكمية الاذى النفسي اللى بيتعرض له الطرفين وخاصة الاطفال عند الاختلاط فى الاماكن العامه او الشوارع المحيطة او المدارس بسبب الفرق المادى والمعنوى وفرق الثقافة كمان 

شكرا واسفين على الاطالة

دا رابط المقال
https://www-madamasr-com.cdn.ampproject.org/c/s/www.madamasr.com/ar/?p=251649
شكرا جزيلا مدى مصر والشكر موصول للرائع مصطفى محيي وكل فريق العمل مصطفى على تعبه ومجهوده وصبره وذوقه

هناك تعليقان (2):