الثلاثاء، 15 نوفمبر 2011

السيد تويتر كرم الله وجهه


بصوا انا عمرى ما وقفت قدامى التكنولوجيا ابدا، بالعكس دائما ماشية مع تيارها حتى لما بانتخ شوية واعمل فيها مش عارفه، لما بركز برده بعرف، انا عرفت الفيس بوك تقريبا كده فى حوالى سنه 2007 او قبل بشوية او بعد بشوية، كان واحد صاحب اخو واحده صحبتى لسه جاى من بره، وتقريبا قاله عليه وهو قالها عليه وهى قالتلى عليه، المهم كنت مش فاهمه منه اى حاجه بس بالمثابره والجلد والتحمل وصلت والامور بقت تمام التمام، وفضلنا بلاد تشيلنا وبلاد تحطنا قصدى فيس يتغير وفيس يتجدد واوبشنز تتغير واوبشنز تتعدل، وانا وراه كل ما الواحد يتعود عليه يغيروه، كنا حسين اننا بنجرى وراهم، هما بيجروا واحنا بنجرى وراهم، المهم بقى قابلت كتير قوى مواقع زى الفيس كده، لكن مفيش حاجه منهم دخلت دماغى ولا شدتنى زى الفيس بوك، اشي اسمه وان، واشي اسمه هاى فايف، وحركات بقى، بس كله كوم يا جماعه والاخ تويتر ده كوم تانى خالص خالص خالص، موضوع تانى بقى، حووووووووار كير قوى، تفتحى التويتر تلاقى كل يبكى على ليلاه، واول ما تبتدى تتعرفى على ليلي تلاقى ليلي بقى عندها حفيد الحفيد، وعلى ما تبتدى تتابعى الصفحه تلاقى الدنيا مهيصه بقى فوق، وتدخل فى يجي 30 تويته جديده، وانت لسه مسجلتيش اعجابك بالى فاتك، ولا حتى عملت ريتويت لاى حاجه منهم، المهم بقى انه بقى مهم جدا، وكل الناس تقولك تويتر مولع دا فى كذا وكذا، انا قريت على تويتر كذا، شفتوا دا هيحصل كذا، عرفتوا ازاى؟ من تويتر طبعا، يالهوى هو تويتر ده كل الناس بتعرف تتعامل معاه إلا انا مصر كلها بتريتويت وتهشتاج وانا لا، آه صحيح دا إلا الهشتاج ده كمان، دا انا اول مره التكنولوجيا تضحك عليه يارجاله، معرفش الهشتاج دى خالص، كل شوية يسرى فوده يقول هشتاج ، هشتجونى امبارح، هيهشتجوك بقى، وانا ولا فاهمه هى بتتعمل ازاى اصلا، يعنى ينفع كده؟ ممكن حد يقول للاخ تويتر كرم الله وجهه انه بيوترننننننننننننى.

هناك 11 تعليقًا:

  1. هههههههههههههههههه
    والله انا زيك بالظبط
    كله حمــــــــادة عندي
    والتويتر دا حماااااادة تاني خالص ^_^

    :D

    ردحذف
  2. واضح انك لسه جديدة على تويتر و مصبرتيش عليه :))

    انا فضلت حوالى شهر مش فاهم حاجة و باخد نصايح من التويبش (اللى هما مشتخمين تويتر ) لحد ما بقيت تمام فيه الحمد لله

    هو الموضوع محتاج شرح وانا عندى امتحانات للأسف ف ممكن على اخر الاسبوع الجاى كدة اكتب مثلا تعلم تويتر بدون معلم بس ربنا يسهل :))

    ردحذف
  3. والله الحال من بعضه .. أنا كمان مش خبرة قوي في تويتر بس شغالة زي الحلاوة معه يعني .. اهو .. بنساير الموضة :)

    سعيدة بمروري هنا .. وان شاء الله من المتابعين .

    ردحذف
  4. الأخ twitter .. ما عجبني منه شي لحد هلأ غير اسمه .. الباقي مجهول .. مع ان عندي عليه account بس انسي .. ولا بعبره .. آخر شي بعتلي we're missing you On twitter ..

    :)

    ردحذف
  5. انا كمان ..لوز العنب فيه خاالص

    ردحذف
  6. هههههههههههههههه
    أنا اللى خلانى اعمل أكاونت على تويتر هو الفضوووول مش أكتر
    دخلت عليه وقلت هافهمه يعنى هافهمه .. يعنى هو هاييجى أصعب من الفيس .. ده كل اللى عليه حتة ستاتس لا راحت ولا جت :D

    والحمد لله دخلت عليه مرتين مالهمش تالت :))))
    بالنسبة لى ممل جــــداً .. مافيهوش حاجة شدتنى ومش عارفة اتعامل معاه فعلاً "زى البنى آدم اللى دمه واقف كدة :D "

    ردحذف
  7. ههههههههههههههههههههههه
    كلامك عسل اوى
    انا كمان مش فاهمه اى حاجه فيه خاااااااالص
    واللى يقولى ده سهل بس اتعودى عليه
    بس بجد مش عارفه افهمه خالص
    انا قولت انى انا اللى جالى تاخر عقلى فى الجزء التكنولوجى من دماغى
    بس هو اللى بجد طلع رخم بقى

    ردحذف
  8. انا بقى حاولت مع تويتر كتير بس واضح انه هو اللى رافض يخلينى افهمه وحاليا انا اعلنت استسلامى ومش هحاول افهمه تانى

    سيبك بقى المهم انتى بجد جميلة اوى

    ردحذف
  9. شكرا لكل الناس انها رجعتلى ثقتى فى نفسي بجد يا جماعه نورتم الدنيا والحمد لله انى مش لوحدى مع الاخ تويتر ده وبالنسبة بقى لدروس تويتر ربنا يجزيك عنا كل خير ياباشا

    ردحذف
  10. انا ياريت حد يدخل يدور عليا لو لاقنى يبقي كتر خيره ياريت يقولى انا مسميه نفسي ايه وانا شطارة منى هعرف الباص ورد هههههههههههههههههههه

    التويتر دة عالم الكائنات الغريبه انا بالنسبه ليا حماده بالجنزبيل فعلا ولافهمت حاولت انا واختى مرة اتشلينا علشان نتابع حد بس ونعرف ندخل ونرد

    يالهوووووووووتى :):)

    ردحذف
  11. احااااا يا جدعااان امال الناس الي اخترعت تويتر نفسه تبقي ايه انشاء الله كائنات فضائيه مثلا احنا كلامنجي بس فعلا علي فكرره مصر خدت الاولي علي العالم في 2011 علي تويتر اكتر ناس اتكلمت ووتوتت ومبطلوش كلام هما المصريين المركز الاول في الكلام يعني
    مساء الفل عليكو

    ردحذف